Asociación de Moaña

Arquivo para a categoría ‘San Resaquiño’

San Resaquiño 2011


Un ano máis a asociación A Ghudalla organiza, polas festas de San Martiño, o San Resaquiño na casa da cultura de Abelendo, este ano o día elixido será o sábado 12 de novembro.

Volveremos contar coa participación da Treboada do Ghato que por terceiro ano consecutivo se achegarán a Moaña para encher as nosas rúas co son dos seus incribles bombos, que semellan, como ben o seu nome indica, o son dunha treboada. Sairán da casa da cultura ás 20:00 e despois de recorrer a parroquia voltarán alí para rematar a súa actuación e dar comezo ós concertos ás 21:30.

Os grupos cos que contaremos este ano serán:

  • Samu a “Caraperro” -> é membro do grupo punk “Mala Ratxa” (Marín, Santomé) e nos sorprende en solitario coa súa guitarra electroacústica cunha serie de cancións sobre os colegas, a vida no seu pobo, etc. cunha denotada raíz punk. Estará con nós para amenizarnos o cambio entre os demais grupos, polo que poderedes disfrutar do seu espectáculo o longo da noite.
  • Thee Blind Crows -> grupo pontevedrés que mestura blues, garage e punk de moita calidade sendo só dous compoñentes, guitarra e batería.
  • Ocekaos -> grupo de Moaña de hip-hop que pese a levar pouco tempo xa están triunfando co seu estilo tan propio.
  • Falperry´s -> este grupo os que acudistes o ano pasado xa o coñeceredes. Para os que non, dicirvos que fan unha mestura entre folk-mugre-punk ainda que eles mesmos definen a súa música como tabernaria. Ainda que so teñen unha maqueta os seus membros levan xa un longo percorrido con grupos como Skacha, Motor Perkins ou  Extremidades Pelijrosas.

Aquí vos deixo un mapa para quen non sepa chegar, o lugar indicado en verde é a casa da cultura de Abelendo, se queredes que vos indique o camiño só tedes que premer no mapa e levaravos a google maps.

Por suposto a entrada é de balde!!!!  Contamos con vos!!!

San Resaquiño 2010


O 13 de novembro, con motivo das festas de San Martiño a asociación A Ghudalla organizará por segundo ano consecutivo o San Resaquiño.

Os concertos volverán realizarse na casa da cultura de Abelendo en Moaña.

Ás 21:00 dará comezo a inauguración oficial de San Resaquiño coa incrible treboada do Ghato, partindo da casa da cultura e facendo pasarrúas cos bombos polo barrio.
22:00 Cé Orquestra Pantasma abrirá a xornada de concertos na casa da cultura. Este é un magnifico home orquestra que toca variedade de temas populares e non tan populares, para tódolos públicos. Un espectáculo que non vos podedes perder.
A seguir Estado Puro , consolidado grupo Pop Rock de Moaña irá quentando os motores un pouquiño máis.

E para rematar Falperry´s, eles defínense como música taberneira, un grupo que de seguro dará que falar. Con compoñentes de Skacha e Motor Perkins esta nova banda sorprenderanos.

Sorpresas: as sorpresas non se contan,  senón non serían tal.

Esperamos vervos alí!!!!!!!!!!!!

San Resaquiño 2009


O venres 13 de novembro, a asociación A Ghudalla organizou, na casa da cultura de Abelendo, unha noite de concertos.

Comezou cun pasarrúas de bombos de treboada e posterior foliada na casa da cultura de Abelendo. A continuación actuou Leo i Arremecaghoná, un cantautor procedente de Matamá e a seguilo actuaron Grand´s, un grupo de hip hop moañés. O remate deles, Leo volveu animarse a subir as táboas para amenizar a festa.Xa por último fixo unha sesión de música dj Xavi, membro do grupo Xtraperlo que nun principio ían actuar nos concertos pero por problemas técnicos tiveron que cancelalo.

Inda que o tempo non acompañou en absoluto a xente animouse a subir para gozar do día da re-festa co gran resacón arrastrado dos días da festa de San Martiño, os cales agradecemos a súa asistenta e esperamos que repitan cada ano

Concurso Gastronómico


O martes 10 de novembro, véspera do día grande das festas, a asociación A Ghudalla fixo un taller de artesanía musical e xogos para os nenos, no adro da igrexa de San Martiño. Houbo unha moi boa acollida por parte de pais e nenos.

Máis tarde, ás 20.00, tivo lugar un concurso gastronómico no mesmo lugar. Os produtos que participaban eran empanadas, viño branco e viño tinto pero coa condición de que todo fora da casa.

Os gañadores foron:

  • Mellor viño tinto: o de covas.
  • Mellor viño branco: o do furancho do lado do cruceiro.
  • Mellor empanada: a dunha veciña da feira.

Os xuíces estaban compostos por unha representante da comisión de festas, outra da asociación de mulleres de Moaña e outro da asociación A Ghudalla.

Nube de etiquetas